„Það virðist engu máli skipta Gunnar Nelson við hverja hann berst, í hvaða sæti þeir eru eða hversu nálægt hann er því að geta barist um titilinn. Það sem skiptir hann máli er að klára bardagana sína.“

Á þessum orðum hefst grein á ESPN um bardagamanninn íslenska. Gunnar vann Alan Jouban í UFC bardaga fyrir rúmri viku, í London. Í greininni er haft eftir Gunnari að hann vilji ljúka öllum sínum bardögum með rothöggi eða uppgjöf andstæðingsins. Honum hugnist ekki að safna stigum til að vinna með ákvörðun dómara.

„Sumir þessara manna ganga í hornin sín eftir og fá að heyra að þeir hafi unnið lotuna. Í mín eyru hljómar það þannig að þeir séu að reyna að vinna lotur.“

Gunnar heldur áfram. „Mér finnst að bardagamaður eigi að klára bardagann ef hann getur. Ef þú vilt verða sannur meistari þarftu að klára bardagann. Þannig lít ég á það.“

„Ef maður er meistari en bardagarnir fara alltaf alla leið þá hefur þú sýnt að þú getur haldið beltinu gegn þeim bestu, en ég vill verða sannur meistari.“

Gunnar vann Jouban á hengingartaki í bardaganum á dögunum, eftir að hafa vankað hann með höggi. Hann vinnur yfirleitt bardaga sína á hengingartaki.

Haft er eftir Gunna að þjálfarinn hans, John Kavanagh, hafi haft frumkvæði að því að gefa bardaga við Stephen Thompson undir fótinn. „Ég myndi elska að berjast við hann, en ég heyri að hann vill ýmis Robbie [Lawler] eða Carlos [Condit]. Það er í lagi. Ég mæti honum bara síðar. Mér er alveg sama við hvern af þessum bestu ég berst. Ég ætla að klára þá alla, eða flesta þeirra allavega.“