Víkingur Reykjavík hefur samið við miðjumanninn Ágúst Eðvald Hlynsson en þetta staðfesti félagið í kvöld.

Þessi 19 ára gamli leikmaður kemur til Víkings frá Brondbly í Danmörku þar sem hann lék með varaliði félagsins.

Ágúst gerir þriggja ára samning við Víkinga en hann er uppalinn hjá Blikum og lék fjóra aðalliðsleiki þar áður en hann hélt erlendis.

Fréttatilkynning Víkings: 

Knattspyrnudeild Víkings hefur samið við Ágúst Hlynsson um að leika með félaginu næstu þrjú árin.

Í dag náðist samkomulag við Brondby um félagaskipti miðjumannsins Ágústar Eðvalds Hlynssonar. Ágúst, sem er 19 ára gamall, er uppalinn í Breiðabliki þar sem hann lék fjóra leiki 16 ára gamall með aðalliði félagsins áður en hann var seldur til Norwich í Englandi.

Í Englandi lék Ágúst með yngri liðum og varaliði félagsins þar til hann var seldur til Brondby og hefur hann leikið með yngri og varaliðum danska félagsins undanfarin tvö ár. Ágúst á að baki 24 leiki og 4 mörk fyrir yngri landslið Íslands.

Knattspyrnudeild Víkings fagnar að hafa gert þriggja ára samning við þennan unga leikmann sem bætist í flóru þeirra efnilegu leikmanna sem fyrir eru hjá félaginu.