Ferðaskrifstofan Gaman Ferðir skilaði ferðaskrifstofuleyfi sínu inn í gær og hefur hætt starfsemi. Í fréttatilkynningu frá fyrirtækinu kemur fram að fall WOW air, sem átti 49% hlut í ferðaskrifstofunni, hafi reynst mun þyngri baggi en ráð hafði verið fyrir gert. Þrátt fyrir góða stöðu fyrirtækisins hafi verið ljóst að lausafjárstaða þess næstu sex mánuðina yrði ekki nægilega sterk til að hægt væri að réttlæta áframhaldandi starfsemi.

Morgunblaðið hefur eftir Braga H. Magnússyni, öðrum framkvæmdastjóra fyrirtækisins, að ákveðið hafi verið að grípa strax til aðgerða svo viðskiptavinir fyrirtækisins lendi ekki í meiri vandræðum ef fyrirtækið yrði gjaldþrota.

„Við erum búin að reyna allt held ég sem mannlegt er hægt að reyna í að finna fjármagn til að ýta okkur í gegnum skaflinn en það tókst ekki.“

Sagði hann.

14 manns störfuðu hjá fyrirtækinu og hefur þeim öllum verið sagt upp.

Forsvarsmenn Gaman Ferða funda með Ferðamálastofu í dag um framhaldið og hvað verður um fyrirhugaðar ferðir félagsins.

„Mér finnst eðlilegt að það fólk sem hefur greitt fyrir ferð og við erum búin að greiða fyrir þjónustuna erlendis, að það fólk fái bara að fara í sína ferð.“

Hefur Morgunblaðið eftir Braga.