Andrés Ingi Jónsson, þingmaður VG, fór í hjartaþræðingu í morgun. Hann birti af mynd af sér af göngum hjartadeildar Landspítalans og yfirskiftina: „Verkefni dagsins“. Fyrir nokkrum vikum, nánar tiltekið þann 21. mars, skýrði Andrés Ingi frá því að þetta væri í uppsiglingu, en hjartasjúkdómar eru algengir á meðal karlmanna í ætt hans. Andrés skrifaði þá:

„Fyrir átta árum fór ég í hjartarannsókn, eftir að frændi minn fékk hjartaáfall hálffertugur og við fórum að sjá skýrt mynstur hjartasjúkdóma hjá karlmönnum í ættinni. Þá kom í ljós að kólesterólið hjá mér var í hæstu hæðum og sneiðmynd af hjartanu sýndi talsverðar þrengingar í einni kransæðinni. Síðan þá hef ég verið á lyfjum til að halda þessu í skefjum, auk þess að vera meðvitaður um mataræði og hreyfingu.“

Þrátt fyrir þessa lífsstílsbreytingu reyndist hjartaþræðing hins vegar óhjákvæmileg:

„Um daginn fór ég aftur í sneiðmyndatöku til að sjá hver staðan væri. Þá kom í ljós að þrengingin var orðin að algjörlega lokaðri kransæð. Ég hef ekki fundið nein einkenni þessa, er hinn hressasti og að öðru leyti lítur hjartað ágætlega út. Þetta þýðir hins vegar að fljótlega fer ég í hjartaþræðingu til að losa stífluna.“

Andrés lýsir vonbrigðunum með þessa niðurstöðu en einnig hvernig hann hefur sæst við hana. Mun hann ekki þurfa að vera nema 2-3 daga frá vinnu vegna aðgerðarinnar:

„Það er auðvitað dálítið sjokk og jafnvel svekkelsi að mér hafi ekki tekist að forðast það að fara í aðgerð, en ég stæði frammi fyrir mun erfiðari stöðu ef ég hefði ekki verið í reglubundnu eftirliti og meðferð undanfarin átta ár. Þá er jákvætt að þessi aðgerð fyrirbyggir vonandi enn verri stöðu í framtíðinni – og eins furðulegt og það kann að virðast, þá er hjartaþræðing til þess að gera minniháttar aðgerð þannig að ég þarf líklega ekki að vera frá vinnu nema 2-3 daga.“