Það hefur sætt töluverðri gagnrýni að undanförnu að Símon Sigvaldason, dómsstjóri Héraðsdóms Reykjavíkur, skipaði Þorstein Einarsson og Svein Andra Sveinsson skiptastjóra þrotabús WOW air. Margir lögmenn hafa tjáð sig um málið og gagnrýnt þetta og þung orð hafa fallið um ógagnsæi og spillingu innan Héraðsdóms Reykjavíkur.

Nú bætist enn í óróleikann í kringum þessa skipun því samkvæmt umfjöllun í nýjasta tölublaði Mannlífs, sem kom út í morgun, þá hefur Arion banki, sem er einn af stærstu kröfuhöfunum í bú WOW air, farið fram á að Sveinn Andri verði settur af sem skiptastjóri vegna vanhæfis.

Haraldur Guðni Eiðsson, forstöðumaður samskiptasviðs bankans, staðfesti þetta við Mannlíf. Hann staðfesti að þetta tengist ágreiningi við bústjóra þrotabús tölvufyrirtækisins Data Cell en Arion banki er stærsti kröfuhafinn í það þrotabú. Sveinn Andri er skiptastjóri þrotabúsins.