Karlmaður á fertugsaldri hefur verið ákærður fyrir að veitast með ofbeldi og hótunum að geðlækni á geðsviði Landspítalans á Hringbraut. Samkvæmt ákæru hótaði hann lækninum með hníf. Hann er enn fremur sakaður um að hafa hótað fjölmörgum lögreglumönnum á aðfangadag í fyrra.

Maðurinn er sakaður um að hafa þann 12. september síðastliðinn hótað geðlækni með hnífi. Í ákæru segir að hann hafi dregið upp kjöthníf úr peysuvasa, gengið í átt að lækninum og otað hnífnum fram líkt og hann ætlaði að stinga lækninn í bakið. Læknirinn ku hafa flúið viðtalsherbergið en þá hafi maðurinn elt hann með hnífinn á lofti og gerði tilraun til að stinga hann með honum ofarlega í búk eða andlit. Læknirinn náði að verjast honum og varnarteymi geðdeildar yfirbugaði manninn í kjölfarið.

Karlmaðurinn er enn fremur sakaður um að hafa valdið talsverðu uppnámi á aðfangadag. Hann er sagður hafa hringt í Neyðarlínuna og hótað lögreglumanni sem svaraði. Samkvæmt ákæru sagði hann „ef ég mæti þér hérna í myrkrinu þá sting ég þig fyrst“ og „ekki vera fokking aumingi þá kem ég bara og sker bara upp í hálsinn“. Hann hótaði að stinga alla þá lögreglumenn sem sendir yrðu til hans. Samtals átta lögreglumenn voru þó sendir til hans og ógnaði hann þeim með tveimur hnífum. Samkvæmt ákæru sagðist maðurinn ætla að leggja til þeirra og eða stinga þá.

Ofan á fyrrnefnd brot er hann ákærður fyrir tvö vopnalagabrot en í báðum tilvikum var hann gómaður með hníf á sér. Hann var auk þess tekinn með tæplega gramm af amfetamíni þegar lögregla hafi afskipti af honum við verslun 66° norður að Laugavegi 17.