Maður á Reyðarfirði er gagnrýndur fyrir að vera með ísbúð og rafrettuverslun í sama húsnæðinu og undir sameiginlegu nafni, Shake n´ Vape. Foreldrar á Reyðarfirði hafa áhyggjur af ástandinu og gagnrýna mjög þessa markaðssetningu. Þetta kemur fram á fréttavefnum austurfrett.is. Þar segir meðal annars:

„Ísbúð verður opnuð í húsnæðinu sem áður hýsti Shell-stöðina á Reyðarfirði á sunnudag en þar hefur rafrettuverslunin, Djákninn verið til húsa síðan í haust. „Húsið er 150 fermetrar og Djákninn er í 20 fm lokuðu rými,“ segir Gunnar Viðar Þórarinsson, eigandi ísbúðarinnar og Djáknans.“

Eigandinn segir að ávallt hafi verið gætt að aldurstakmarki inn í rafrettubúðina og það verði áfram, enginn undir 18 ára aldri fari inn í rafretturými verslunarinnar.

Mest fer fyrir brjóstið á foreldrum samkrull íssölunnar og rafrettusölunnar í sameiginlegu nafni staðarins. Um þetta segir í fréttinni:

„Samhliða opnun ísbúðarinnar verður búðin merkt með nafninu „Shake n‘ Vape“ og merki sem sýnir bæði ís og rafrettu. Það samkrull er það sem helst hefur farið fyrir brjóstið á foreldrum á Reyðarfirði sem hafa áhyggjur að verið sé að reyna að markaðssetja rafrettur til ungmenna með þessum hætti. „Við hvetjum foreldra til að nýta tækifærið til að ræða við börn sín um gagnrýni á markaðssetningu,“ segir Bryndís Guðmundsdóttir, formaður foreldrafélags grunnskólans á Reyðarfirði.“

En eigandinn segir að farið verði í einu og öllu eftir þeim reglum að selja eingöngu 18 ára og eldri rafrettuvarninginn.