Óskar Hrafn Þorvaldsson hefur verið ráðinn samskiptastjóri VÍS. Óskar tekur við af Andra Ólafssyni sem hverfur til starfa á öðrum vettvangi. Þetta kemur fram í frétt á heimasíðu félagsins.
Óskar Hrafn hefur áralanga reynslu af fjölmiðlum, var meðal annars fréttastjóri á Stöð 2, Vísi.is og DV. Þá var hann um tíma yfirmaður Stöðvar 2 Sport en hefur að mestu unnið sjálfstætt sem ráðgjafi undanfarin misseri. Óskar Hrafn hefur einnig verið viðloðandi knattspyrnu lengi og þjálfar hann karlalið meistaraflokks Gróttu sem leikur í Inkasso-deildinni í sumar.
Í frétt VÍS kemur fram að Óskar Hrafn muni stýra miðlun upplýsinga til fjölmiðla og markaðsaðila. Til viðbótar mun hann bera ábyrgð á mótun ófjárhagslegrar upplýsingagjafar og samfélagsábyrgð félagsins.
Hann mun hefja störf í byrjun apríl.
