Samkvæmt bókunarsíðu WOW air er lokað fyrir bókanir á allmargar dagsetningar til Kaupmannahafnar og Lundúna næsta mánuðinn. Skilaboðin „Ekkert flug“ blasa við þegar reynt er að fara inn á þessar dagsetningar.

Ekki er óhugsandi að uppselt sé í hluta þessara ferða, en fjöldi þeirra vekur athygli. Þannig er t.d. ekki hægt að bóka flug til Kaupmannahafnar 26. mars, 3. apríl, 5. apríl, 7. apríl, 19. apríl, 27. apríl og 3. maí næstkomandi.

Heim frá sömu borg er ekki hægt að bóka 3. apríl, 5. apríl, 7. apríl, 14. apríl, 19. apríl og 27. apríl. Til Lundúna er ekki hægt að bóka flug með WOW air 31. mars, 1. apríl, 10. apríl, 23. apríl, 25. apríl, 27. apríl, 28. apríl og. 30 apríl. Heim frá Lundúnum er ekki hægt að bóka 31. mars, 1. apríl, 10. apríl, 23. apríl, 25. apríl, 27. apríl, 28. apríl og 30. apríl. Þar koma líka upp skilaboðin „Ekkert flug.“

Rétt er að geta þess að páskarnir eru í apríl, auk þess sem sumardagurinn fyrsti er líka í mánuðinum og má leiða líkum að því að eftirspurn eftir flugi aukist til muna vegna þessa.

Í frétt á vef Túrista kemur fram að ákveðin óvissa sé með flug morgundagsins að minnsta kosti. Þannig gerir áætlun WOW ráð fyrir fjórtán brottförum frá Keflavíkurflugvelli á morgun, þar af eru átta í fyrramálið. Nú sé staðan þannig að eingöngu sé hægt að bóka sæti í fjórar þeirra. Þá er bent á að í ljósi stöðu WOW sé ólíklegt að allir miðar til Amsterdam, Parísar, London og Kaupmannahöfn séu uppseldir.

„Seinni partinn á morgun eiga flugvélar WOW svo að fljúga til fimm borga í Norður-Ameríku auk Tenerife. Núna er aðeins hægt að bóka miða til spænsku eyjunnar og Toronto en ekki til New York, Baltimore/Washington, Boston eða Montreal,“ segir í frétt Túrista.