„Góður vinur og félagi, einn af rekstraraðilum fyrstu kosningamiðstöðvar Pírata, hefur kvatt okkur. Kristján Steinarsson er látinn. Ég vil skilja hérna eftir til þeirra sem þekktu hann, innan flokksins ásamt til fjölskyldu og aðstandenda, innilegar samúðarkveðjur. Þetta var sárt, verulega sárt…! Elsku Kristján… Takk fyrir mig kæri vinur og far vel, við hittumst vonandi síðar.“
Þetta skrifar Sævar Óli Helgason innan Facebook-hópsins Píratar í Reykjavík. Þar minnast Píratar fallins félaga og velta upp þeirri hugmynd að borgarstjórnarflokkur þeirra minnist hans sérstaklega við tækifæri. Kristján var 49 ára.
Þórgnýr Thoroddsen, fyrrverandi varaborgarfulltrúi Pírata, þakkar Sævari fyrir tilkynninguna. „Þetta er mikil sorgarfrétt! Þakka þér fyrir að koma þessu til okkar,“ skrifar Þórgnýr. Alexandra Briem, núverandi varaborgarfulltrúi, tekur undir. Hún segir:
„Mikið er það leitt að heyra. Samúðarkveðjur frá mér.“
Ásta Guðrún Helgadóttir, fyrrverandi þingmaður flokksins, segir Kristján hafa mikið gert fyrir flokkinn. „Væri ekki við hæfi að borgarstjórnarflokkur Pírata í Reykjavík eða Píratar í Reykjavík myndi minnast Kristjáns þegar tækifæri gefst? Kristján vann mikið í fyrstu kosningum Pírata í Reykjavík, þrammaði allt Breiðholtið með bæklinga, hellti upp á kaffi og gekk í þau störf sem þurfti,“ segir Ásta Guðrún og bætir við:
„Ég geri mér grein fyrir því að það eru eflaust margir hér sem kannski þekktu hann ekki, þar sem hann datt soldið úr starfinu í seinni tíð, af ýmsum ástæðum. Ég veit ekki hvernig best væri að fara að því, og vil heyra í ykkur hér – annaðhvort að senda blóm eða samúðarkveðju þegar við á.“
Halldór Auðar Svansson, fyrrverandi borgarfulltrúi, segir þetta þjóðráð. „Algjörlega rakið. Finnum út úr því hvað er mest við hæfi að gera.“
