Starfsgreinasambandið hefur slitið viðræðum við Samtök atvinnulífsins, en þetta var ljóst eftir árangurslausan fund samningsaðila hjá ríkissáttasemjara í morgun.
Í frétt mbl.is er haft eftir Birni Snæbjörnssyni, formanni Starfsgreinasambandsins, að ekkert nýtt tilboð hafi komið fram frá Samtökum atvinnulífsins. Á föstudag sagði Starfsgreinasambandið að viðræðuslit væru yfirvofandi ef ekkert nýtt kæmi fram.
„Samninganefnd SGS samþykkir að komi ekki nýjar hugmyndir eða viðbrögð frá Samtökum atvinnulífsins á næstu dögum hafi viðræðunefndin fulla heimild til lýsa yfir árangurslausum viðræðum þrátt fyrir milligöngu Ríkissáttasemjara og slíta viðræðum,“ sagði í tilkynningu sambandsins á föstudag.
Viðræðuslitin þýða að meiri líkur eru nú á að félagsmenn Starfsgreinasambandsins, sem eru um 20 þúsund í það heila, fari í verkfall í apríl eða maí.
„Þetta þýðir að við förum í að kalla saman okkar aðgerðahóp og þar munum við taka ákvörðun um það hvernig við munum í framhaldinu skipuleggja okkur til þess að setja meiri þrýsting á að ná kjarasamningum,“ sagði Björn í samtali við mbl.is.
