Karlmaður hefur verið úrskurðaður í gæsluvarðhald til 10.apríl næstkomandi en hann er grunaður um að hafa í minnst þrjú skipti skipulagt smygl á fólki hingað til lands og til annarra ríkja.
Maðurinn var handtekinn 5.febrúar síðastliðinn og í kjölfarið úrskurðaði Héraðsdómur Reykjaness að hann skyldi sæta gæsluvarðhaldi til 10.apríl. Landsréttur staðfesti úrskurðinn í gærdag, þann 15.mars.
Í gæsluvarðhaldsúrskurði Héraðsdóms Reykjaness kemur fram að fyrsta atvikið hafi verið þann 27. febrúar 2018. Þá kom kona, sem talin er vera kærasta mannsins hingað til lands, ásamt manninum og öðrum karlmanni.
Þann 2. janúar síðastliðinn var maðurinn stöðvaður við komuna til landsins í flugstöðinni í Keflavík en þá var hann í fylgd með með systkinum. Maðurinn sagðist vera einn á ferð og systkinin sögðust hafa ferðast ein til Íslands.
Sóttu þau í framhaldinu um alþjóðlega vernd og tjáðu þau tollvörðum að þau hefðu rifið skilríki sín í fluginu. Vegabréf þeirra beggja fundust hins vegar við leit í tösku mannsins og viðurkenndi hann þá að hafa ferðast með þeim til Íslands.
Mánuði síðar, þann 2.febrúar síðastliðinn kom síðanfimm manna fjölskylda hingað til lands og óskuðu eftir alþjóðlegri vernd.
Kona úr hópnum sagðist hafa keypt flugmiðana til Íslands fyrir fjölskylduna og greitt fyrir þá með reiðufé en ekki þekkt manninn sem seldi henni miðana. Sannreynt hefur verið að miðarnir voru keyptir af hinum ákærða. Konan, og aðrir fjölskyldumeðlimir sögðust hins vegar ekki kannast við manninn.
Meint brot mannsins varða sektum eða allt að sex ára fangelsi.
