„Fjórir einstaklingar eru í haldi Lögreglunnar á höfuðborgarsvæðinu í þágu rannsóknar máls þar sem skotum var hleypt af í Vogunum snemma í morgun. Tilkynning um skothvelli við hús í hverfinu barst kl. 6.20 og fór lögreglan þegar á vettvang, en skothvellirnir voru þagnaðir þegar þangað var komið.“

Þetta kemur fram í tilkynningu frá lögreglu. Þar segir að tveir einstaklingar sem voru í íbúðinni hafi verið handteknir og aðrir tveir sem voru fyrir utan húsið. Þá lagði lögreglan hald á skotvopn sem fannst í húsinu, auk nokkurra skothylkja sem fundust á vettvangi. Í skeyti lögreglu segir:

„Þá liggur fyrir að byssukúlur höfnuðu í tveimur bifreiðum, sem stóðu fyrir utan húsið. Af þessu er ljóst að mikil hætta var á ferðum og mildi þykir að enginn skyldi slasast þegar þetta átti sér stað.“