Árni Snævarr, starfsmaður Sameinuðu þjóðanna og áður fréttamaður, lýsir á Facebook heldur óþægilegu atviki sem hann lenti við komu til Íslands á dögunum. Hann var krafinn um skilríki af vopnuðum lögreglumönnum við komu til landsins frá landi innan Schengen.

„Ég varð fyrir afar óþægilegri reynslu við komuna til Íslands í síðustu viku, sem situr í mér. Við landganginn biðu vopnaðir lögreglumenn sem kröfðu flugfarþega skilríkja með afar miklum þjósti. Ég spurði lögreglumanninn hvað hefði orðið um Schengen-samninginn, en hann spurði mig á móti: „Árni ertu að neita að sýna skilríki“. Afar sérkennileg spurning því ég hélt á passanum mínum,“ lýsir Árni.

Árni segir að lögreglumaðurinn hafi brugðist illa við þegar hann óskaði eftir númeri hans. „Ég spurði á móti á hvaða lagalega grundvelli landamæravarsla hefði verið tekin upp að nýju á Schengensvæðinu. Lögreglumaðurinn sagði að löggan mætti spyrja alla um skilríki, hrifsaði af mér passann og var mjög ógnandi í allri framkomu. Ekkert númer eða auðkenni var sjáanlegt á búningi lögreglumannsins og ég spurið í sakleysi mínu, hvert númer hans væri. Hann romsaði því bálreiður út úr sér, en ekki var nokkur leið fyrir mig að ná því,“ segir Árni.

Hann segist óttast að atvik sem þessi geti grafið undan réttaröryggi á Íslandi. „Ef löggan getur án þess að gefa upp nokkra ástæðu komið á landamæraeftirliti skil ég ekki til hvers Schengen og norræna vegabréfasamkomulagið er. Og ef lögreglumenn hafa engin auðkenni eða númer á búningi sínum, er vonlaust að láta þá standa reikningsskil á gerðum sínum og þar með grafið undan réttaröryggi í landinu,“ segir Árni.