Fósturvísir sem inniheldur 0,001% erfðaefni úr manni, en restina úr svíni, hefur verið búið til á tilraunastofu. Um er að ræða fyrstu sönnun þess að hægt sé að búa lífveru með því að blanda saman erfðaefni manna og dýra. Slíkar lífverur eru stundum kallaðar Kímerur en Kímera er ófreskja úr grískri goðafræði, samsett úr ljóni, geit og dreka).

Þetta kemur fram í vísindaritinu Cell, en BBC gerir niðurstöðurnar að umtalsefni. Þar kemur fram að ferlið sé mjög flókið og að vísindin eigi nokkuð langt í land með að geta ræktað líffæri fyrir mannfólk í dýrum. Þó þykja tíðindin vera markverð.

Til að geta búið til Kímeru er stofnfrumu úr manneskju – þeirrar gerðar sem getur myndað hvers kyns vef sem er – komið fyrir í fósturvísi svíns. Fósturvísinum er svo komið fyrir í legi gyltu í allt að einn mánuð. Við það ferli verða mikil afföll. Af þeim 2.075 fósturvísum sem komið var fyrir í gyltum náðu aðeins 186 þeirra 28 daga þroskastigi. En þrátt fyrir það sáu vísindamennirnir merki um að frumurnar úr manninum, innan í eggfrumu svínsins, virkuðu. „Þetta er í fyrsta sinn sem við höfum séð mennskar frumur þroskast innan í öðru dýri,“ hefur BBC eftir prófessornum Juan Carlos Izpisua Belmonte.

Á tilraunastofu Hér er verið að sprauta erfðaefni manns inn í eggfrum svínsins.

Spurður um þau miklu afföll sem urðu segir Belmonte að meðgönguferli manna og svína sé mjög ólíkt enda hafi þessar lífverur þróast með mjög ólíkum hætti í gegn um aldirnar. Svín gangi með afkvæmi sín í um fjóra mánuði en mannfólk í um níu. „Þetta er eins og hraðbraut þar sem einn bíll fer miklu hraðar en annar. Við þær aðstæður er mikil hætta á slysi.“

Hann bætti við að þess væri enn langt að bíða að hægt yrði að rækta líffæri fyrir mannfólk í svínum. Niðurstöðurnar gætu hins vegar nýst til frekari rannsókna, svo sem á eðli sjúkdóma, og gæti dýpkað sklining vísindamanna á þróun fósturvísa – svo eitthvað sé nefnt.