Fréttamaðurinn Bogi Ágústsson segir það alrangt á Facebook-síðu sinni að hann sé meðlimur í félaginu Ísland-Palestína. Því hefur verið haldið fram af andstæðingum Hatara en þeir virðast telja að hljómsveitin sé skipulagður áróður á vegum fréttastofu RÚV.

„Mér hefur verið bent á að því sé haldið fram á einhverjum síðum á netinu að ég sé virkur í félaginu Ísland-Palestína. Þetta er ekki rétt, ég er ekki í félaginu, hvorki virkur né óvirkur. Svo það sé á hreinu þá er ég í Norræna félaginu, Félagi Sameinuðu þjóðanna, Kalak-vinafélagi Íslands og Grænlands og svo er ég félagi í Knattspyrnufélagi Reykjavíkur. Man í svipinn ekki eftir að vera í fleiri félögum,“ segir Bogi.

Sjá einnig: Margrét segir hótunina misskilning og vill frelsa Hatara – Ívar telur RÚV stýra Hatara

Hann bætir því við að hann sé þó formaður eins félags. „Kannski er rétt að taka fram að ég er formaður stjórnar Stofnunar dr. Sigurbjörns Einarssonar. Tilgangi Stofnunar dr. Sigurbjörns er lýst í stofnskrá: ,,Hlutverk Stofnunar dr. Sigurbjörns Einarssonar er að vinna að rannsóknum og fræðslu í trúarbragðafræði og guðfræði í þeim tilgangi að auka þekkingu og skilning á trúarbrögðum heimsins og stuðla að sáttargjörð ólíkra trúarviðhorfa, vinna gegn tortryggni og efla skilning og umburðarlyndi.“,“ skrifar Bogi.

Hjálmtýr Heiðdal kvikmyndagerðarmaður segir í athugasemd að Bogi ætti heima í félaginu Ísland-Palestína. Bogi svarar því svo: „Hjálmtýr, ég lít svo á að fréttamenn eigi ekki að taka virkan þátt í pólitísku starfi. Ég lét því af allri pólitískri þátttöku þegar ég hóf störf á Sjónvarpinu fyrir öllum þessum áratugum.“