Suðvestanstormurinn, sem spáð hafði verið að myndi skella á í morgunsárið, er nú farinn að láta að sér kveða á suðaustanverðu landinu. Á fimmta tímanum í nótt var tilkynnt um ferðafólk í vanda á leiðinni á milli Hornafjarðar og Djúpavogs. Fólkið er stopp og þorir hvorki að aka áfram né afturábak vegna veðurofsans. Rúðurnar í bílnum eru brotnar og er það ekki til að bæta ástandið.

RÚV skýrir frá þessu og hefur eftir Davíð Má Bjarnasyni, upplýsingafulltrúa Landsbjargar, að björgunarsveitarmenn séu á leið til fólksins.

Á Höfn í Hornafirði var óskað aðstoðar björgunarsveita á fimmta tímanum vegna fjúkandi þakplatna.

RÚV hefur eftir Óla Þór Árnasyni, veðurfræðingi, að vindhraðinn sé víðast hvar á Suðurlandi, frá Markarfljóti austur á austanverða Austfirði, kominn yfir 23 metra á sekúndu en það er stormstyrkur. Enn á eftir að bæta í vind.