Móðir Jóns Þrastar Jónssonar sem hvarf í Dublin á Írlandi fyrir ríflega tveimur vikum segir að þetta sé það versta sem nokkur móðir getur upplifað, að finna ekki börnin sín. Hún og bróðir Jóns Þrastar voru í viðtali við Virgin Media News þar sem fjallað er um málið. Bróðir Jóns, Daníel, segir að það sé afar ólíkt Jóni að láta sig ekki vita af sér. Daníel segir að Jón sé kletturinn í fjölskyldunni og ekki bara bróðir heldur vinur og föðurímynd líka. „Allir sem þekkja Jón vita að hann myndi aldrei gera svona,“ segir Daníel og á við að Jón myndi aldrei vísvitandi láta sig hverfa,

Í fréttinni kemur fram að síðast sást til Jóns í öryggismyndavélum fyrir utan sjúkrahús í Whitehall í Dublin, laust eftir kl. 11 laugadagsmorguninn 9. febrúar. Hann skildi vegabréfið sitt eftir á hótelinu en fór út með töluvert af reiðufé og greiðslukort sín. Engar færslur hafa verið af greiðslukortum hans síðan hann hvarf. Jón Þröstur fór til Dublin ásamt unnustu sinni til að taka þátt í pókermóti.

Víðtæk leit hefur staðið yfir að Jóni undanfarið og í henni hafa bæði tekið þátt hópur sjálfsboðaliða frá Íslandi og írska lögreglan. Meðal annars er leitað eftir stubbum af Prince sígarettum sem Jón reykti en eru ekki seldar á Írlandi.