Starfsmönnum Ölgerðarinnar verður fækkað um 25, þvert á öll svið fyrirtækisins, í kjölfar breytinga hjá fyrirtækinu. Þetta kemur fram í frétt á heimasíðu Ölgerðarinnar þar sem greint er frá því að rekstur fyrirtækisins verði einfaldaður og hluta lagerstarfsemi og dreifingar útvistað. Hluta þeirra starfsmanna sem missa vinnuna býðst að taka við störfum í tengslum við útvistunina.

„Ölgerðin verður frá og með næstu mánaðamótum alhliða drykkjarvörufyrirtæki en allur annar innflutningur verður á sama tíma hjá dótturfyrirtækinu Danól,“ segir í fréttinni.

Andri Þór Guðmundsson, forstjóri Ölgerðarinnar, segir að starfsemi fyrirtækisins hafi margfaldast á undanförnum árum og viðskiptaumhverfið kalli á að fyrirtækið leiti leiða til að gera hlutina betur, auka möguleika til vaxtar, hagræða og styrkja sig á markaði.

„Fyrirtæki sem fylgist ekki með breytingum og aðlagar sig ekki að nýjum aðstæðum verður í vanda og við höfum óhikað tekið ákvarðanir sem þessar til að halda okkur í fremstu röð,“ er haft eftir Andra á heimasíðu Ölgerðarinnar.