Eiður Smári Guðjohnsen og Arnar Þór Viðarsson voru í dag tilkynntir sem nýr þjálfara íslenska U21 landsliðsins.

Það eru spennandi verkefni framundan hjá U21 liðinu en Eiður og Arnar taka við af Eyjólfi Sverrissyni.

Eiður er sjálfur mjög spenntur fyrir verkefninu en hann er að taka að sér sitt fyrsta alvöru þjálfaraverkefni.

,,Mér líst frábærlega á þetta. Ég held að þetta skref hafi komið fyrr en ég átti von á en þegar þetta kom upp þá þurfti ég ekki langan tíma til að hugsa það,“ sagði Eiður.

,,Ég þekki Arnar Viðarsson vel og veit hvernig við erum saman og veit hvernig við hugsum um fótbolta. Við þekkjum hvorn annan það vel innan sem utan vallar. Hann er einn af fáum mönnum sem ég hefði tekið þetta verkefni að mér með.“

Það var ekki búist við að Eiður myndi fara svo snemma út í þjálfun en hann hafði áður talað um að það væri ekki planið.

,,Kannski hefur það breyst að ég hafði spilað erlendis og verið það erlendis lengi að ég vildi finna fyrir hungrinu á að þjálfa. Ég hugsa að það hafi komið á fyrsta verkefni KSÍ.“

,,Ég hef tekið að mér þjálfun í fótboltaskólum erlendis og fann fyrir miklu þakklæti þegar ég var að taka svona hluti að mér og hafði gaman að því að vera inni á vellinum hvort sem það voru krakkar eða unglingar.“

,,Við eigum mikið af spennandi leikmönnum. Ég held að sá hópur sé alltaf að stækka og breikka. Við erum með fullt af leikmönnum sem eru með þónokkra reynslu að spila fyrir U21 landsliðið, sem tóku þátt í síðustu undankeppni. Svo er ég viss um að það sé fullt af leikmönnum sem eru annað hvort að spila í Inkasso-deildinni eða Pepsi deildinni sem eru tilbúnir bæði líkamlega og andlega. Ef þeir eru að þá eiga þeir góðan möguleika á að komast í þennan hóp.“

,,Markmiðið fyrir undankeppnina, það er sett á að komast upp úr riðlinum það er klárt mál. Ég er nokkuð viss um það að við eigum nógu mikið af gæðaleikmönnum til að mynda gott lið og við þurfum að sjá til þess að við séum í baráttunni þar til á síðustu stundu að komast í lokakeppnina.“

,,Ég leyfi Arnari að halda það að hann taki ákvarðanir en svo tek ég þær bara! Við erum það léttir að við getum alveg deilt herbergi. Hvort það verði áfram eftir fyrstu tvo leikina verður að koma í ljós. Við erum fullorðnir menn í dag svo ég held að við séum ekki alveg tilbúnir í það að sofa í sama herbergi.“

Eiður var svo spurður út í syni sína sem eru efnilegir knattspyrnumenn. Andri Lucas Guðjohnsen og Daníel Stristan Guðjohnsen spila fyrir Real Madrid.

Það er ákvörðun sem kom aðeins á óvart þar sem Eiður er fyrrum leikmaður Barcelona. Hann er ekki byrjaður að hugsa um hvort Andri verði valinn í hóp undir hans stjórn eða ekki.

,,Í rauninni er það skrítið þar sem við bjuggum í Barcelona en ég held að fólk gleymi því að Andri Lucas, sem er eldri strákurinn, var aldrei í Barcelona, hann var í Espanyol. Það var okkar ákvörðun sem fjölskylda að hann færi ekki einn þangað og á endanum var það ekki svo erfitt.“

,,Ég leyfi tímanum aðeins að líða. Það verða allir með Guðjohnsen eftirnafnið í þessum hóp! Það er ekki komið upp í hugann ennþá. Við vorum að hugsa um aðra hluti fram að þessu. Varðandi liðsstjórn, hver hefur verið sjúkraþjálfari, markmannsþjálfari eða læknir liðsins.“

,,Við þurfum að setja upp æfingaleiki, við þurfum að vinna okkar vinnu gagnvart leikmönnum og hvaða leikmenn koma virkilega til greina í þennan hóp og það er ekki enn byrjað. Hvort sem það sé Andri Lucas Guðjohnsen eða einhver annar.“

,,Ef þeir hafa líkamlegan styrk, nógu mikil gæði og eru tilbúnir í þetta þá er alveg sama hversu menn eru gamlir eða hvað þeir heita.“