Vegna fréttaflutnings undanfarinna daga um að ekki sé hægt að endurprenta jólabækur hérlendis hefur Prentmet sent frá sér yfirlýsingu þess efnis að fyrirtækið fullvinni allar tegundir bóka og sé að prenta íslenskar bækur fyrir jólin.
Í tilkynningunni segir:
„Vegna fréttaflutnings undanfarna daga vilja forráðamenn Prentmets leiðrétta þann misskilning að ekki sé hægt að endurprenta jólabækur hérlendis. Árið 2003 keypti Prentmet Félagsbókbandið Bókfell og samhliða því kom mikið af reynslumiklu starfsfólki til starfa hjá Prentmet.
Prentmet er í dag eina prentsmiðja landsins sem getur fullunnið harðspjaldabækur og getur framleitt allar gerðir bóka. Höfum í gegnum tíðina unnið með fremstu bókahönnuðum landsins í hefðbundinni og óhefðbundinni bókaframleiðslu.
Það er ósk okkar hjá Prentmet að fjölmiðlar leiðrétti þennan misskilning að ekki sé hægt að framleiða harðspjalda bækur á Íslandi.“
