Kona kvartaði í vetur yfir meintri kynferðislegri áreitni af hendi flugþjóns í flugvél um borð í Icelandair. Konan sendi inn kvörtun til Icelandair vegna málsins en fékk þau svör að rannsókn væri lokið og ekki yrði aðhafst í málinu.

Morgunblaðið greinir frá þessu en sjá má kvörtun konunnar á vefsíðu Neytendasamtakanna FlyersRights.org.

Konan segist hafa verið snert á óviðeigandi hátt af karlkynsflugþjóni í flugi frá Íslandi til New York þann 8. janúar síðastliðinn. Hafi maðurinn starað á sig og snert á sér öxlina og handlegginn í hvert skipti sem hann talaði við sig. Hann hellti síðan fyrir slysni ávaxtasafa yfir konuna og baðst ekki afsökunar, að hennar sögn. Enn fremur segir konan að flugþjónninn hafi þrýst líkama sínum að hnjám hennar og mitti er hann teygði sig yfir hana til að taka upp blað sem fallið hafði á gólfið. „Ég sagði honum að hætta þessu en hann gerði það ekki. Mér fannst verulega brotið á mér og upplifði mig varnarlausa,“ segir konan í kvörtun sinni.

Áður en konan lagði inn formlega kvörtun tilkynnti hún um atvikið til Icelandair í gegnum Twitter. Þar svaraði yfirflugfreyja henni þess efnis að atvikið hefði ekki getað átt sér stað þar sem flugþjónninn væri samkynhneigður. Orðrétt var svar yfirflugfreyjunnar: „Hann hefur ekki áhuga á þér, hann hefur áhuga á karlmönnum.“