Kona á þrítugsaldri, Mónika Atladóttir hefur verið dæmd í 30 daga fangelsi fyrir að húðflúra þrjár stúlkur, þar af tvær á barnsaldri, án vottorðs frá Landlækni og skriflegs leyfis forráðamanna. Þetta er ekki fyrsta brot Móniku en hún hefur áður hlotið dóma fyrir þjófnaði, umferðarlagabrot og brot gegn lögum um ávana- og fíkniefni og var nú síðast dæmd til að sæta fangelsi í þrjá mánuði, þann 10. september 2018.
Í febrúar á þessu ári greindi DV frá því að hún Mónika hafi verið dæmd í mánaðar skilorðsbundið fangelsi fyrir að hafa stolið nærbuxum, að verðmæti ríflega þúsund króna, úr verslun Lindex á Þorláksmessu. Sjálf furðaði Mónika sig á þessum dómi í samtali við DV og sagðist hún frekar hafa búist við sekt þar sem hún viðurkenndi sök fúslega.
Sagði hún að nærbuxurnar hefðu í raun verið nauðsynjavara þar sem að hundur hennar sækist mikið í að borða nærbuxur hennar og var hún því brókarlaus degi fyrir jól.
„Hundurinn minn er svo hrifinn af því að naga hluti úr bómull og nælonefnum. Þannig að ég verð alltaf mjög fljótt uppiskroppa með allt svona og ég er ekkert á sérstaklega háum launum, því ég er á féló,“ sagði Mónika í samtali við DV í febrúar síðastliðnum.
Ofangreind brot Móniku sem sneru að húðflúrun á þremur stúlkum áttu sér stað í byrjun desember á seinasta ári. Þetta kemur fram í úrskurði sem féll í Héraðsdómi Norðurlands eystra þann 26.nóvember síðastliðinn.
Fram kemur að húðflúrunin hafi farið fram í heimahúsi í íbúð á Akureyri en sem fyrr segir voru tvær af stúlkunum undir átján ára aldri.
Þá var Mónika ekki með skriflegt leyfi forráðamanna stúlknanna til að húðflúra þær en fram kemur í ákæru að með þessu hafi hún „stefnt heilsu stúlknanna í alvarlega hættu.“
Mónika var því ákærð, og sakfelld, fyrir brot á barnaverndarlögum, lögum um hollustuhætti og mengunarvarnir og reglugerð um hollustuhætti auk þess sem henni er gert að sætaupptöku húðflúrunartækja og lita.
Fram kemur að Mónika hafi játað verknaðinn við skýrslutöku hjá lögreglu en hún sótti ekki dómþing þrátt fyrir að hafa verið birt fyrirkall.
