Lögreglan á höfuðborgarsvæðinu rannsakar nú mál þar sem töluvert magn kannabisefna, eða rúm 2 kg, uppgötvaðist af tollayfirvöldum í Kanada, á leið til Íslands. Í kjölfar rannsóknar voru framkvæmdar tvær húsleitir hér á landi en í annarri þeirra fannst nokkuð magn metamfetamíns. Þrír karlmenn á þrítugsaldri voru handteknir vegna málsins en voru þeir látnir lausir eftir skýrslutökur, enda telst málið að mestu upplýst.

Um er að ræða aðra sendinguna af kannabisefnum frá Kanada, á þessu ári, sem löggæsluyfirvöld stoppa, en í fyrri sendingu voru rúm 13 kg af kannabisefnum haldlögð.

Þetta kemur fram í tilkynningu frá lögreglunni á höfuðborgarsvæðinu.