„Kvenfólkið úr mötuneyti Útvegsbankans fór allt í frí þann 24. Svo karlmenninir þvoðu diskana sína bara upp sjálfir.“ Þetta kom fram í frétt Vísis þann 25. október 1975. Daginn áður var tekið stór skref í jafnréttisbaráttunni, þegar fyrsti Kvennafrídagurinn fór fram og þúsundir kvenna gengu út af vinnustöðum sínum. Á meðan sinntu karlmennirnir störfum kvennanna: ritstörfum, símavörslu, móttöku og barnagæslu og hlutu sumir mikið lof fyrir.

Sjötti Kvennafrídagurinn er í dag og líkt og áður eru íslenskar konur hvattar til að leggja niður störf klukkan 14:55 til að mótmæla kynbundnum launamun og misrétti á vinnustöðum.

Dagblaðið Vísir greindi frá því sem fram fór á fyrsta Kvennafrídeginum, á því herrans ári 1975.

Blaðamaður og ljósmyndari voru staddir í miðborginni þegar útifundurinn á Lækjartorgi fór fram og tóku púlsinn á fólkinu. Heimsóttu þeir meðal annars Útvegsbankann sáluga og vakti það athygli þeirra að karlkyns starfsmenn gengu þar í störf kvennanna.

Bragi Björnsson tók til hendinni í eldhúsinu og hrósar blaðamaður honum fyrir dugnaðinn.

„Hér má sjá einn þann allra faglegasta,“ segir í texta fyrir neðan myndina.

Sumar konur ákváðu þó að sniðganga fundarhöldin og héldu störfum sínum áfram.

„Nokkrar konur voru að vinna í Landsbankanum í gær, þar sem þessi mynd var tekin.  Ein kvenna sagði þær fylgjandi baráttu fyrir jafnfrétti kynjanna en teldu aðgerðir eins og kvennafrí ekki rétt vopn í baráttunni,“

segir í grein Vísis.

Tíminn gerði Kvennfrídeginum sömuleiðis skil en í fyrirsögn blaðsins frá 26.október 1975 er Kvennafrídagurinn kallaður „dömufrí.“

„Það var algeng sjón á föstudaginn að sjá feður með börn sín á götum úti,“ ritar blaðamaður.

„Allvíða voru sjoppur opnar og þó nokkrar verzlanir og mátti sjá konur við störf sín þar eins og ekkert væri. Hvarvetna á götum úti mátti sjá karlmenn með börn í kerrum, vögnum eða á handlegg sér og víða á vinnustöðum mættu ferður með börn sín og settu upp myndarlegustu barnagæzlu á stöðunum.“