Cristiano Ronaldo, leikmaður Juventus á Ítalíu, er á forsíðum flestra blaða í Evrópu þessa stundina.

Ronaldo er ásakaður um að hafa nauðgað fyrirsætunni Kathryn Mayorga árið 2009 eftir að þau höfðu skemmt sér á næturklúbbi.

Atvikið á að hafa átt sér stað í Las Vegas en enn sem komið er ekkert sem sannar að Ronaldo hafi gerst brotlegur.

Fyrrum félag Ronaldo, Real Madrid, hefur nú ákveðið að kæra portúgalskt blað sem fjallaði um málið.

Í grein blaðsins var talað um að Real hafi skipað Ronaldo að borga Kathryn til að þagga niður í henni á sínum tíma.

Real hafði áhyggjur af sínum nýjasta manni á þessum tíma en hann kostaði spænska liðið 80 milljónir punda árið 2009. Félagið á að hafa fengið Ronaldo til að ljúka málinu án þess að mæta fyrir dómstóla.

Real neitar þessum ásökunum og hefur ákveðið að kæra blaðið Correio da Manha í kjölfarið.

Kathryn segist sjálf hafa verið of hrædd til að fara með málið lengra á sínum tíma en ákvað nýlega að kæra Ronaldo á ný fyrir meinta nauðgun.