Svo virðist sem áhuginn á íslenska landsliðinu í fótbolta hafi minnkað á einni nóttu, ef mið má taka af miðasölu á leiki karlalandsliðsins.
Síðustu ár hefur verið uppselt á alla heimaleiki liðsins og það langt fram í tímann. Nú þegar sex dagar eru í leik gegn Sviss í Þjóðadeildinni þá er mikið af miðum til.
Íslenska liðið fór á HM í sumar í fyrsta sinn, magnaður árangur. Liðið fékk svo tvo skelli gegn Sviss og Belgíuo
„Ég skil nú ekki alveg þessa umræðu,“ sagði Jóhann Berg Guðmundsson, landsliðsmaður við mbl.is.
,,Fyrir tveimur leikjum síðan vorum við á heimsmeistaramótinu í fótbolta – á stærsta sviðinu. Vissulega komumst við ekki upp úr riðlinum þar en vorum þó nokkuð nálægt því. Svo koma þjálfaraskipti og þessi skellur á móti Sviss, og tap gegn Belgíu sem er efst á heimslista. En ég veit ekki af hverju fólk ætti ekki að koma og sjá okkur gegn sterku liði Sviss, því við viljum klárlega hefna fyrir fyrri leikinn. Ég á von á að völlurinn verði fullur á mánudaginn. Liðið er byggt á sömu leikmönnum og voru á HM og hafa gert það sem við höfum gert síðustu ár, og ég sé enga ástæðu til þess að við förum í einhverja lægð núna.“
