Í dag leggur Kristján Þór Júlíusson, sjávarútvegsráðherra, fram frumvarp á Alþingi til breytingar á lögum um fiskeldi. Frumvarpinu er ætlað að tryggja að laxeldisfyrirtækin Fjarðalax og Arctic Fish geti haldið starfsemi sinni áfram þrátt fyrir að starfsleyfi þeirra hafi verið afturkölluð. Í frumvarpinu kemur fram að sjávarútvegsráðherra geti, að undangenginni umsögn Matvælastofnunar, veitt fyrirtækjum í laxeldi bráðabirgðastarfsleyfi til allt að tíu mánaða.

Fréttablaðið skýrir frá þessu í dag. Fram kemur að frumvarpinu sé ætlað að laga til framtíðar, með almennum hætti, annmarka sem er á lögum um fiskeldi. Sá annmarki er að í núverandi lögum er eina úrræði Matvælastofnunar að stöðva starfsemi fiskeldisstöðvar ef rekstrarleyfi hennar er fellt úr gildi. Því hafi stjórnvöld engin úrræði til að koma í veg fyrir óafturkræfa og óþarfa sóun verðmæta og geti ekki gætt meðalhófs, segir í tilkynningu frá sjávarútvegsráðherra.

Með frumvarpinu er fyrirtækjunum tveimur veittur frestur til að fara yfir umhverfismat fyrirtækjanna til að tryggja að umsóknir þeirra um aukið laxeldi á sunnanverðum Vestfjörðum verði samkvæmt lögum og reglum.