Íslenska ríkið hefur samið við lyfjaframleiðandann GlaxoSmithKline um kaup á 300.000 skömmtum af bóluefni gegn inflúenseu „eins fljótt og auðið er eftir að lýst hefur verið yfir heimsfaraldri“. Samningurinn gildir í fjögur ár með möguleika á framlengingu í allt að 10 ár.

Fréttablaðið skýrir frá þessu í dag. Samningurinn, sem byggir á sambærilegum samningi Dana við fyrirtækið, er hluti af viðbragðsáætlunum vegna heimsfaraldurs inflúensu. Samningurinn tryggir að Íslendingar fá bóluefni ef til heimsfaraldurs kemur.

Framleiðsla á bóluefni hefst ekki fyrr en heimsfaraldri hefur verið lýst yfir og því munu fjórir til sex mánuðir líða frá upphafi faraldurs þar til hægt verður að afhenda bóluefnið.