Dani Osvaldo, fyrrum landsliðsmaður Ítalíu, hefur lagt skóna á hilluna en hann spilaði með liðum eins og Juventus, Roma og Southampton á ferlinum.

Osvaldo tjáði sig um Cristiano Ronaldo, leikmann Juventus í gær og viðurkenndi það að hann hafi aldrei verið eins metnaðarfullur og Portúgalinn.

Meira:
,,Viðurkennir að hann hafi aldrei verið eins og Ronaldo – ,,Fór í fótbolta í gær og kafnaði næstum vegna reykinga“

Osvaldo er aðeins 32 ára gamall en hann ákvað að hætta til þess að geta lifað lífinu eins og hann kýs að gera það.

Ítalinn hefur nú tjáð sig um Lionel Messi, leikmann Barcelona en hann væri alls ekki til í að lifa sama lífi og einn besti leikmaður sögunnar.

,,Væri ég til í að vera eins og Messi? Nei en ég væri til í að spila eins og hann,“ sagði Osvaldo.

,,Hann á ekkert líf. Það er eins og hann lifi í gull fangelsi. Hann gæti ekki farið einhvert og fengið sér drykk í friði.“

,,Kannski er honum alveg sama en það sama má ekki segja um mig. Ég ímynda mér að hann kaupi stærsta sjónvarpsskjá í heimi en hann er aldrei heima í stofu til að nota það.“

,,Hann keyrir örugglega um á Ferrari vitandi það að hann sé aðeins 15 mínútum frá æfingasvæði Barcelona.“