Það eru ekki allir knattspyrnumenn jafn metnaðarfullir og Cristiano Ronaldo, leikmaður Juventus.
Ronaldo er þekktur fyrir það að vera mjög metnaðarfullur og hugsar um fátt annað en að vinna og að vera í sínu besta standi.
Það sama má ekki segja um fyrrum framherjann Dani Osvaldo sem hefur lagt skóna á hilluna.
Osvaldo var góður leikmaður á sínum tíma og spilaði með liðum eins og Roma, Sampdoria, Inter og Boca Juniors. Hann var einnig í ítalska landsliðinu.
Osvaldo reyndi fyrir sér í fótbolta með vinum sínum í gær en átti á endanum í erfiðleikum með að anda vegna reykinga.
,,Ég er ekki mikill aðdáandi morgnanna. Ég reyki mikið og fór í fótbolta í gær með vinum mínum og kafnaði næstum því,“ sagði Osvaldo.
,,Cristiano Ronaldo fer heim og gerir 150 armbeygjur en mér finnst skemmtilegra að undirbúa grillveislur.“
,,Fótboltinn gaf mér tækifæri á að hjálpa fjölskyldunni minni og að þéna mikið og ég þarf ekki að vinna aftur.“
,,Hann breytti mínu lífi en tók einnig frelsið frá mér og ég get ekki gefið það upp. Ég elska samt ennþá fótbolta, ég get ekki neitað því.“