Á uppboðsvefnum eBay má finna allt milli himins og jarðar en eitt uppboð sem nú stendur yfir hefur vakið talsverða athygli. Um er að ræða uppboð á iPhone-snjallsíma sem er nokkuð merkilegur.
Um er að ræða frumgerð af fyrsta iPhone-símanum og er hann frá árinu 2006. Þessi tiltekni sími var ekki fjöldaframleiddur heldur handsmíðaður í Kaliforníu. Því er um að ræða býsna sjaldgæfan grip sem margir safnarar vilja komast yfir.
Nú þegar sjö dagar eru eftir af uppboðinu stendur hæsta boð í 36 þúsund Bandaríkjadölum, tæpum fjórum milljónum króna og þykir ekki ólíklegt að síminn muni seljast á mun hærri upphæð. Eins og sjá má stendur „Ver. 1.1.1“ aftan á símanum sem stendur fyrir að um sé að ræða allra fyrstu útgáfuna.
iPhone-símarnir hafa notið ótrúlegra vinsælda á undanförnum árum og hafa milljónir slíkra selst á síðastliðnum rúmum áratug.
Þó að síminn sé dýr er hann ekki búinn öllum þeim tækninýjungum sem snjallsímar dagsins í dag bjóða upp á – eðlilega kannski. Hann er þó búinn þráðlausu neti og myndavélin er tveggja megapixla.
