Starfsmaður á dvalarheimili á Akranesi varð uppvís að því að stela morfínskyldum lyfjum. Umræddur starfsmaður hefur látið af störfum vegna málsins og hefur málið verið tilkynnt til Landlæknisembættisins.
Þetta staðfestir Kjartan Kjartansson, framkvæmdastjóri Dvalarheimilisins Höfða á Akranesi, þar sem málið kom upp, í samtali við Fréttablaðið í dag.
Að sögn Kjartans komst málið upp við reglulegt eftirlit í nýliðnum júlímánuði þegar misræmi kom í ljós. Starfsmaðurinn sem um ræðir var þá í sumarleyfi en viðurkenndi þjófnaðinn þegar hann sneri aftur til vinnu.
Ekki var um verulegt magn að ræða og segir Kjartan við Fréttablaðið að það líti út fyrir að um einangrað tilvik hafi verið að ræða.