Rúnar Kristinsson, þjálfari KR, var sáttur með sína menn í kvöld eftir 2-0 baráttusigur gegn Grindavík.

Staðan var lengi markalaus á KR-velli en heimamenn gerðu út um leikinn með tveimur mörkum undir lokin.

,,Þetta var erfiður leikur, þetta er frábært Grindavíkurlið og þeir verjast mjög vel og eru mjög góðir í fótbolta þegar þeir spila,“ sagði Rúnar við Stöð 2 Sport.

,,Við vorum þolinmóðir og sýndum aga. Við vörðumst vel þegar við þurftm að verjast og svo opnar Óskar leikinn beint úr aukaspyrnu eins og í síðustu viku. Það er mikilvægt að hafa svona vopn þó það hafi ekki verið geggjað fast skot eins og síðast.“

,,Við erum sáttir með stígandann í okkar leik, við höfum nú unnið þrjá leiki í röð. Þeir hafa trú á því að þeir séu góðir í fótbolta en við förum ekki fram úr okkur. Við erum enn að berjast um Evrópusæti og eigum enn eitthvað í land til að ná toppliðunum.“

Rúnar var svo spurður út í varnarmanninn Albert Watson sem var á bekknum annan leikinn í röð.

,,Ég spilaði bara sama byrjunarliðinu og í síðustu viku, hann var tæpur í þeim leik og var á bekknum.“

,,Það hefur myndast áhugi á honum og við höfum fengið nokkur símtöl. Hann hefur staðið sig vel í sumar og er okkar leikmaður.“

,,Öll samskiptin eru þó núna á íslensku í vörninni sem er jákvætt.“