Jose Mourinho, stjóri Manchester United, hefur svarað orðrómum um að Anthony Martial vilji komast burt frá félaginu í sumar.

Martial spilaði með United í æfingaleik í nótt en liðið gerði 1-1 jafntefli við MLS liðið San Jose Earthquakes.

Mourinho var svo spurður út í framtíð Frakkans en hann segir að það sé ekki mögulegt að fá allt sem þú vilt í þessu lífi.

,,Ég væri til í að vera í Los Angeles en núna er ég í San Jose,“ sagði Mourinho eftir leikinn í nótt.

,,Þú getur ekki gert hvað sem þú vilt í lífinu. Ég væri til í að koma til Los Angeles og æfa þar og spila alla fimm leikina þar og sleppa við það að ferðast og skipta um hótel áður en ég sný aftur til Manchester.“

,,Ég væri til í að spila gegn Leicester City á sunnudegi en ég verð að spila við þá á föstudagi svo þú færð ekki alltaf það sem þú vilt í þessu lífi.“