Jóhann Berg Guðmundsson, landsliðsmaður, hefur tjáð sig um þátttöku Íslands á HM í sumar en hann er nú mættur aftur til æfinga hjá Burnley.

Á heimasíðu Burnley er að finna viðtal við knattspyrnukappann um allt það sem gekk á í Rússlandi og þá ótrúlegu staðreynd að Ísland hafi tekið þátt á HM.

,,Þetta var ótrúleg upplifun og ekki eitthvað sem ég bjóst við að ég myndi gera með Íslandi,“ sagði Jóhann.

,,Það bjóst enginn við því að Ísland myndi komast alla leið, það var frábært að fá að vera þarna.“

,,Það fylgdu ákveðin vonbrigði, að vera svona nálægt því að komast upp úr riðlinum en á sama tíma finnurðu fyrir stolti þegar þú sérð alla fjölskylduna í stúkunni og fólki sem fylgdi liðinu til Rússlands.“

,,Eftir allt saman fórum við aftur á hótelið og horfðum til baka. Þetta var ótrúlegur tími og bara ótrúlegt að Ísland hafi tekið þátt.“

,,Við höfðum komist á Evrópumeistaramótið en það var ekkert í samanburði við þetta mót.“

Jóhann sneri svo aftur heim til Íslands eftir að liðið hafði lokið keppni og starfaði sem sérfræðingur fyrir Rúv.

Hann segir að móttökurnar hér heima hafi verið frábærar og að allir hafi verið stoltir af árangri liðsins.

,,Þegar þú hittir fólk á götunni þá var þér þakkað fyrir allt saman. Það gaf þeim mikla ánægju að fá að horfa á sitt lið spila á stærsta sviði fótboltans.“

,,Það var enginn leiður og allir töluðu um að við hefðum gert vel. Á sama tíma þá hugsaru með þér að við höfum viljað aðeins meira en eitt stig.“