Kári Árnason gæti vel verið hættur með landsliðinu en hann spilaði ekki gegn Króatíu í dag.

Kári hefur lengi staðið vaktina með íslenska liðinu og spilaði stórt hlutverk í undankeppni EM 2016 og nú HM 2018.

Kári er kominn á seinni árin í boltanum og gæti verið búinn að spila sinn síðasta landsleik.

,,Er hann búinn að greina frá því? Gott að hann ákveði það fyrir mig,“ sagði Kári eftir að honum var tjáð að Aron Einar Gunnarsson væri búinn að taka ákvörðunina fyrir hann um að hann væri hættur.

,,Við sjáum til. Auðvitað er að líða á seinni hlutann á ferlinum og kannski er kominn tími á að stoppa en ef Heimir velur mig þá get ég ekki sagt nei við landsliðinu.“

,,Þetta er það skemmtilegasta sem ég geri og mín stoltustu móment á lífsleiðinni hafa komið með landsliðinu. Ég er mjög stoltur af því að vera partur af þessu liði og er stoltur af þessum strákum.“

,,Auðvitað var ég búinn að leiða hugann þangað en ég ætla ekki að vera með eitthvað big statement að ég sé hættur með landsliðinu en það lítur þannig út svolítið.“

,,Okkar mesta legend brenndi sig svolítið á því að segja að hann væri hættur og kom svo aftur, maður veit aldrei.“

,,Að koma á HM með liðinu var draumur fyrir okkur alla og eins og ég sagði áðan hafa mín stoltustu móment í fótbolta og í lífinu með þessu liði.“

,,Ég er stoltur af því að hafa contributað til að við komumst á EM þar sem við stóðum okkur vel og svo komumst við á HM. Við verðskulduðum meira úr þessum leik.“

,,Ég skil Heimi fullkomlega og Sverrir stóð sig fullkomlega í dag. Maður þarf að stíga til hliðar og yngri og ferskari menn koma inn. Ég átti minn hlut í undankeppninni og er stoltur af því.“

,,Ég hef heyrt af einhverjum áhuga en ekkert er staðfest,“ bætti Kári við varðandi framtíðina en hann samdi við Víking Reykjavík fyrr á árinu.