„Við stelpurnar höldum vel hópinn. Við erum saman á hóteli og ferðumst saman á milli staða. Það er búið að vera æðislegt að vera með þeim, en það myndast mikil stemning og góður vinskapur á þann hátt,“ segir Jóna Vestfjörð Hannesdóttir, unnusta Hólmars Arnar Eyjólfssonar, varnarmanns íslenska landsliðsins í fótbolta.

Jóna er í viðtali við Glamour þar sem hún varpar ljósi á þá miklu og góðu vináttu sem ríkir milli maka strákanna sem nú keppa í Rússlandi.

„Við höfum verið duglegar að fara saman út að borða, skoðunarferðir. Síðan hefur Kristbjörg hans Arons stýrt stífum og ströngum æfingum fyrir okkur á morgnana. Þetta er bara búið að vera æðislegt,“ segir hún en myndir af stelpunum saman í stúkunni á leikjum íslenska liðsins hafa birst í fjölmiðlum.

Stelpurnar halda hópinn enda fá þær lítið að sjá strákana meðan á móti stendur.

„Það er takmarkað af slíkum hittingum. Við höfum þó hist í hádegismat daginn fyrir leik. Það er mikilvægt, bæði fyrir þá og okkur, að geta hist í stuttan tíma yfir kaffibolla. Það er að sjálfsögðu mikil pressa á strákunum og þeir hafa held ég bara gott af því að sjá framan í konur sínar og börn í stuttan tíma öðru hvoru þegar á svona stórmóti stendur.“

Viðtalið við Jónu má lesa hér.