Það er ekki alltaf tekið út með sældinni að vera alnafni strákanna okkar í landsliðinu. Því hafa þeir Birkir Bjarnason, Kári Árnason og Gylfi Þór Sigurðsson fengið að kynnast. Hér er ekki um að ræða landsliðsmennina því þetta eru alnafnar þeirra og fást við eitthvað allt annað en að spila fótbolta á hæsta stigi.
RÚV fjallaði um þetta í skemmtilegu innslagi fyrir HM en þar ræddi Haukur Harðarson meðal annars við sjúkraþjálfarann Kára Árnason, en eins og kunnugt er leikur alnafni hans lykilhlutverk í vörn íslenska liðsins. Kári er sjúkraþjálfari á Landspítalanum og á stofu sem heitir Gáski.
Þegar hann var spurður hvort einhverjir fylgifiskar hefðu fylgt því að vera alnafni landsliðsmannsins Kára, sagði Kári:
„Þetta byrjaði eiginlega í fyrsta leik á EM 2016, þá byrjaði eiginlega ballið. Þá fór síminn minn á algjört tripp, ég hélt það væri kominn einhver vírus í hann, hann bara blikkaði, blikkaði og blikkaði, fullt af fólki að elta mig á Instagram og adda mér á Facebook. Ég vissi ekki hvað var í gangi fyrst og svo hélt þetta áfram í leik númer tvö og þrjú,“ segir Kári.
Þegar einhverjir fulltrúar evrópska knattspyrnusambandsins, síða sem heitir KSÍ Fan Page og ungir knattspyrnuáhugamenn fóru að elta hann á Instagram lagði hann saman tvo og tvo og áttaði sig á að þarna hlytu að vera tengsl á milli.
„Svo þegar ég var spurður hvort ég væri hinn eini sanni Kári Árnason þá fór ég að kveikja á einhverjum perum. Þetta kom mér skemmtilega á óvart.“
Kári lítur ekki svo á að um áreiti hafi verið að ræða. „Ekki beint en siminn minn fékk að finna fyrir því fyrstu dagana. Mér fannst þetta aðallega fyndið, svo hafa einstaka skilaboð verið að poppa upp. Sérstaklega núna tók þetta smá kipp aftur í undankeppnini og þegar við vorum komin á HM. Þá fékk ég skilaboð frá Rússum og nú síðast fékk ég skilaboð frá Brasilíu frá manni sem bað mig að senda mynd af því að sonur hans væri mikill aðdáandi. Þá fór ég að hugsa af hverju Kári ætti aðdáendur í Brasilíu. Þetta hefur allt verið mjög spaugilegt.“
Í innslaginu, sem má sjá hér, er einnig rætt við tónlistarmanninn Birki Bjarnason og hagfræðinginn Gylfa Þór Sigurðsson.
