Egyptaland mætir Sádí Arabíu í riðlakeppni HM á morgun en bæði lið eru úr leik fyrir lokaumferð riðlakeppninnar.
Bæði lið eru án stiga eftir fyrstu tvo leikina en Rússland og Úrúgvæ hafa tryggt sér sæti í 16-liða úrslitum.
Það gæti verið að markvörðurinn Essam El-Hadary fái tækifæri hjá Egyptalandi í leiknum á morgun.
El-Hadary yrði þar með elsti leikmaður í sögu HM en hann er 45 ára gamall og á að baki 152 landsleiki.
El-Hadary hefur spilað frá árinu 1993 en hann lék sinn fyrsta landsleik fyrir Egyptaland árið 1996. Hann hefur enn ekki leikið á HM.
El-Hadary getur bætt met Faryd Mondragon sem spilaði fyrir Kólumbíu á HM 2014, 43 ára gamall.