Janne Andersson, þjálfari sænska landsliðsins, var alls ekki ánægður með varamannabekk Þýskalands í gær er liðin áttust við á HM.

Þýskaland lagði Svíþjóð 2-1 í riðlakeppni HM en sigurmark Þjóðverja kom á 95. mínútu í ótrúlegum leik.

Andersson segir að bekkur Þýskalands hafi hagað sér illa eftir sigurmarkið og var hann mjög pirraður í leikslok.

,,Sumir þjálfarar Þýskalands fögnuðu með því að hlaupa í áttina að okkur og nudda þessu í andlitið á okkur,“ sagði Andersson.

,,Ég var mjög pirraður og reiður og það voru margir á varamannabekknum okkar sem voru í eins skapi.“

,,Við börðumst í 95 mínútur og þegar flautað er til leiksloka þá tekurðu í hendina á andstæðingnum og yfirgefur völlinn. Ég var mjög reiður.“