Heimir Hallgrímsson landsliðsþjálfari á von á því að Jóhann Berg Guðmundsson verði klár í slaginn gegn Króatíu í Rostov á þriðjudag. Sá leikur – og úrslitin úr leik Argentínu og Nígeríu – mun skera úr um það hvort Ísland komist áfram í 16-liða úrslit keppninnar. Heimir ræddi við blaðamenn fyrir æfingu landsliðsins í Kabardinka í morgun.

Aðspurður um stöðuna á Jóhanni Berg sagði hann að stefnan hefði verið sú að hann yrði klár gegn Króötum á þriðjudag. Það hefði ekkert breyst og því verður Jóhann að líkindum með gegn Króatíu. Jóhann hefur verið lykilmaður í íslenska liðinu undanfarin ár og var hans sárt saknað í tapleiknum gegn Nígeríu í gær.

„Það var okkar plan að hann myndi ekki ná þessum leik í gær en við vonumst eftir því að hann verði tilbúinn í næsta leik.“