Heimir Hallgrímsson, landsliðsþjálfari Íslands, var að vonum súr í dag eftir tap gegn Nígeríu á HM í Rússlandi.
Heimir segir að leikmenn hafi þó reynt og reynt í 2-0 tapinu í dag og segir að það hafi tekið mikið á að spila í þessum hita.
,,Mér fannst við vera í fínum málum í fyrri hálfleik, við vissum að þeir þyrftu að koma á okkur og 0-0 í hálfleik er eitthvað sem við vildum,“ sagði Heimir við Rúv eftir leikinn.
,,Þeir fá svo mark eftir hornspyrnu hjá okkur og í stöðunni 1-0 eru þeir í draumastöðu, þeir eru með hættulegt skyndisóknarlið.“
,,Það hefði mátt vera meiri orka en það er erfitt að spila í þessum hita. Ég ætla að hrósa strákunum okkar fyrir dugnað og vinnusemi. Það sást á öllum að þeir reyndu og reyndu en þetta nígeríska lið er mjög gott.“
,,Þetta mark hjá þeim breytti leikmyndinni, við þurfutm að fara framar og þá opnaðist leikurinn og þeir nýttu sér það.“
,,Það fór mikil orka í þennan leik og nú þurfum við að safna liði og orku. Við þurfum að vinna Króatíu sem er ekki sérstaklega góð staða miðað við hvernig þeir eru að spila núna.“
