Hitinn í Volgograd á föstudag, þar sem leikur Íslands og Nígeríu fer fram á heimsmeistaramótinu í knattspyrnu, gæti náð allt að 34 gráðum. Þá eru líkur á að sólin muni láta sjá sig nær allan daginn.

Enska landsliðið undirbýr sig nú fyrir leikinn gegn Túnis í kvöld og samkvæmt bresku pressunni hefur mikill hiti og skordýraplága sett strik í reikninginn hjá stuðningsmönnum og öðrum í borginni. Hitinn í dag nær þó ekki 30 gráðum en búist er við enn meiri hlýindum þegar Ísland mætir Nígeríu. Leikur Íslands hefst klukkan 18 og verður hitinn vonandi búinn að lækka örlítið.

Að því er fram kemur í frétt Mail Online þurfti Sky Sports að hætta við beina útsendingu fyrir utan hótel enska liðsins í borginni vegna moskítóflugna sem gerðu dagskrárgerðarmönnum lífið leitt. Þá kemur fram í fréttinni að skordýraeitri hafi verið úðað úr þyrlu á leikvanginn í Volgograd til að létta áhorfendum lífið í kvöld. Þá hefur læknateymi enska liðsins keypt birgðir af efni sem á að halda flugunum frá fólki.

Kaveh Solhekol, dagskrárgerðarmaður hjá Sky Ports, setti færslu á Twitter í gærkvöldi þar sem hann sagðist hafa þurft að hætta við að fara í beina útsendingu vegna plágunnar. „Mikið vandamál hér,“ bætti hann við.

Moskítóflugur hafa verið á sveimi í borginni síðan í maí og hafa borgaryfirvöld reynt að stemma stigu við fjölda þeirra. Hafa þau meðal annars reynt að nota skordýraeitur en árangurinn virðist hafa látið á sér standa. Moskítóflugur eru áberandi á þessu svæði, meðal annars vegna nálægðarinnar við Volgu, lengstu á Evrópu, og þeirrar staðreyndar að Volgograd og nágrenni eru meðal heitustu staða Rússlands.