Víkingur Reykjavík, Valur og Ólafur Jóhannesson hafa náð sáttum en andað hefur köldu þar á milli síðan Ólafur lét ummæli falla í þættinum Návígi á fótbolti.net.

Ólafur sagði þá frá því að samið hafi verið um úrslit í leik Víking og Völsungs árið 2013, eitthvað sem Víkingar tóku ekki vel í.

Allir aðilar hafa nú tekið undir þá ákvörðun að leggja málið til hliðar og skilja sáttir frá borði.

Tilkynning Vals, Víkings og Óla Jó:

Yfirlýsing frá Knattspyrnufélaginu Víkingi, Knattspyrnufélaginu Val og Ólafi Jóhannessyni.

Að undanförnu hafa ásakanir gengið á milli Víkings og Ólafs Jóhannessonar í fjölmiðlum vegna leiks Víkings og Völsungs í deildarkeppni árið 2013.

Aðilar eru sammála um að margt af því sem fram hefur komið hefði mátt kyrrt liggja og ekki ástæða til þess að mál þróist með þeim hætti sem raun ber vitni.

Að frumkvæði þeirra knattspyrnufélaga sem í hlut eiga, hefur náðst full sátt í málinu á milli Ólafs Jóhannesson, Knattspyrnufélagsins Víkings og Knattspyrnufélagsins Vals og er málinu hér með lokið af hálfu allra aðila.