Hörður Snævar Jónsson skrifar frá Moskvu:

Heimir Hallgrímsson landsliðsþjálfari Íslands hefur ákveðið byrjunarliðið sitt fyrir leikinn gegn Argentínu á morgun.

Stærsti landsleikur í sögu Íslands fer fram á morgun er liðið mætir Argentínu í fyrsta leik á HM.

Áhugavert verður að sjá byrjunarlið Íslands, hvort Heimir byrji með einn eða tvo framherja í sínu liði.

Heimir segist hafa frábært fólk í kringum sig, allur undirbúningur Íslands hafi verið til fyrirmyndar.

Meira:
Aron sagði að Heimir væri nú í klípu – ,,Ég fer ekki á pöbbinn á morgun“

,,Ég held að við séum það lengi búnir að undirbúa okkur, ég er það heppinn að það er gott fólk í kringum. Það veit út í hvað við erum að fara. Undirbúningurinn hefur verið það góður, við erum ekki að redda neinu á síðustu stundu sem hefur farið í taugarnar á þjálfara eða þeim sem er að stjórna,“ sagði Heimir í dag.

Hann segist hafa farið í fýlu í gær en þá hafi fólkið í kringum hjálpað til.

,,Ég hef flottan hóp í kringum mig, bara allir í kringum mig. Maður hefur stuðningsnet, ég fór í fýlu í gær en það voru menn sem pikkuðu mig upp, hristu mig til aðeins.“

,,Við erum meðvitaðari um umfangið og spennuna, hvort það hjálpi okkur á vellinum verðum við að sjá á morgun.“