Gylfi Þór Sigurðsson og Aron Einar Gunnarsson virðast hafa það ágætt í Gelendzhik í Rússlandi þar sem undirbúa sig af fullum krafti fyrir leikinn gegn Argentínu á laugardag.
Gylfi birti myndina sem fylgir hér að neðan á Instagram-síðu sinni en á henni má sjá þessa frábæru leikmenn saman í ísbaði. Gylfi og Aron, sem báðir hafa glímt við meiðsli að undanförnu, virka í frábæru formi eins og myndin ber með sér. Ísbaðið er talið koma að góðum notum þegar meiðsli eru annars vegar enda dregur kuldinn úr bólgum. Strákarnir fengu frí frá æfingum í dag en á morgun heldur liðið til Moskvu þar sem leikurinn gegn Argentínu fer fram.
Fullyrt hefur verið að Aron Einar, sem gekkst undir aðgerð á dögunum, verði klár fyrir leikinn gegn Argentínu og muni byrja. Það er vonandi að ísbaðið komi að góðum notum og Aron verði klár í slaginn á miðjunni. Gylfi Þór Sigurðsson er aftur á móti hundrað prósent klár sem eru frábærar fréttir fyrir íslenska liðið.
