„Eftir rúmar 70 sekúndur af þessu lagi var ég byrjaður að naga sundur slagæð á framhandlegg. Plís, reynið öll að dreifa ekki þessum vírus. Hugsið um börnin!“
Þetta segir Kristinn Hrafnsson, blaðamaður og fyrrverandi talsmaður Wikileaks, um nýja HM-lagið sem frumflutt var á dögunum. Í laginu koma margir af þekktustu tónlistarmönnum þjóðarinnar saman og má þar nefna Björgvin Halldórsson, Pálma Gunnarsson, Stefán Hilmarsson, Eyjólf Kristjánsson, Jóhönnu Guðrúnu og Selmu Björnsdóttur svo dæmi séu nefnd.
Eins og gengur og gerist eru skiptar skoðanir um lagið sem ber heitið Syngjum áfram Ísland.
Kristinn deilir skoðun sinni á laginu á Facebook og í færslu sinni er hann ekki beint að skafa af hlutunum, segist hafa verið byrjaður að naga sundur slagæð og hvetur fólk til að deila „ekki þessum vírus“.
Pálmi Gunnarsson, einn þeirra sem syngur í laginu, lætur Kristin heyra það í athugasemd undir. „Ég biðst innilega afsökunar á mínum hluta af slagæðanaginu. Vonandi náðir þú á slysó áður en þér blæddi út,“ segir hann og bætir við: „Spurning hvort þú þurfir ekki að leka þessu út á veraldarvefinn,“ segir hann.
Kristinn svarar og segir: „Menn geta ekki alltaf átt gott mót. Leitt ef mönnum sárnar en þetta er mitt mat. Ég slapp annars við meiriháttar áverka.“
Guðmundur Týr Þórarinsson leggur einnig orð í belg í þræðinum og segir: „Vont lag, úff!“
Pálmi svarar honum fullum hálsi og segir: „Það er örugglega hægt að fá áfallahjálp fyrir þig einhversstaðar.“ Guðmundur svarar að bragði, þakkar fyrir sig en segist vera góður. „Ætlaði ekki að móðga neinn en mér finnst lagið vont, sorry.“
Myndbandið við lagið má sjá hér að neðan. Dæmi nú hver fyrir sig: