Kári verður alveg eyðilagður þegar hann fréttir af andláti Dr. No.

Hann er einn mesti Bondaðdáandi sem um getur og ætlar að verða Bondleikari þegar hann verður stór. En líka fótboltamaður, tónlistarmaður og fornleifafræðingur. Möguleikarnir eru margir þegar maður er sjö ára.

Kári er reyndar búinn að leggja á ráðin um að minnsta kosti fjórar Bondmyndir sem hann ætlar að leika í.

Þær eiga að heita, nöfnin eru frá honum sjálfum komin:

The Golden Man, Falling Drops, The First Secret og Aries, svo er ein enn, en ég man ekki hvað hún heitir, jú Awesome Troubles.

Myndirnar eiga eins og vonlegt er eiga að snúast um tilraunir vondra til að ná heimsyfirráðum. Í Falling Drops mun vondi karlinn til dæmis ætla að eitra heimshöfin og í einhverri þeirra stendur til að kljúfa jörðina í tvennt.

Reyndar hafa Bondmyndir verið settar á svið hér á heimilinu með aðstoð nokkurra bangsa – í einni þeirra mátti Múmínsnáðinn sætta sig við að leika Bondstúlkuna. Það var í The Golden Man.

Kári ætlar svo líka að semja tónlistina í myndirnar, en ég eygi ákveðna von í að fá að leika Q. Ég hef reyndar stundum fengið að bregða mér í hlutverk Oddjob, Stálkjafts, Blofelds eða Scaramanga.

Til að búa sig undir hlutverkið á Kári ágæta Bondbyssu, reyndar er hún í líki íslensks sviðakjamma þótt hún dugi vel sem Walther PPK. Kemur úr þar til gerðum forn-leikfangakassa frá Völuskríni.

Og þaðan er kominn einn aðalbrandarinn í þessari fjölskyldu:

Með hverjum kjamma fylgir Bondbyssa!