Mikill bylur sem gekk yfir austurströnd Bandaríkjanna hefur valdið margháttuðum vandræðum. Flugvellir voru lokaðir í meira en sólarhring, ófærð var mikið og í New York er kvartað undan því að seint hafi gengið að moka burt snjó í sumum hverfum. Miklir snjóruðningar eru víða á götum sem fólk þarf að köngrast yfir. Fjöldi bíla festist í snjó og sumir eru ennþá fastir.

Borgarstjórinn Michael Bloomberg tók snjókomunni með léttúð fyrsta daginn, en nú hefur hann þurft að biðjast afsökunar á seinum viðbrögðum borgarstarfsmanna.

Verst finnst manni nú, á fjórða degi eftir bylinn mikla, að sorphirða hefur öll farið úr skorðum og pokar með rusli hlaðast upp við götur. Eitt dagblaðið hafði uppi stór orð um þetta og uppnefndi starfsmenn sorphirðunnar, kallaði þá abominable snowmen.

Manni verður hugsað um hvað stórar borgir eru í raun viðkvæmar, og hversu lítið má bera út af til að kerfið fari úr skorðum.

Hér er mynd af bíl sem er ennþá fastur í snjó á miðri Manhattaneyju.

Snjó rutt burt af Times Square fyrir hátíðarhöldin þar á gamlárskvöld. Í gær var þar allt í slabbi. Einhverjum á eftir að verða kalt á tánum þar í kvöld.